寻晚10点几，同川瞓落床，打算氹佢瞓觉。临瞓前常规操作都要玩下呢样玩下嗰样唱下歌咁。
忽然间佢指住天花板问：“呢个边个嚟噶？”
我望咗下佢指嘅方向：“嗰个，风扇嚟咯。”
佢已经识讲好多嘢，风扇自然不在话下。
佢继续讲：“唔係，呢个边个嚟噶？”
佢唔係问呢个咩嚟，而係问呢个边个嚟。我霎时间打咗个冷震，可能见到阿飘了。我话：“嗰度冇嘢喔，你见到咩嘢？”
佢再问咗一句：“呢个边个嚟噶？”
我心谂，濑嘢。即刻拉开个窗帘，街上商铺路灯车灯，各种灯光瞬间照向天花板。川的目光慢慢从天花板转移向窗外，仲慢慢坐咗起身。然后佢定定咁望住我，面上一啲表情都冇，唔岩，应该係带有些少不明所以。
我哋静静咁对视咗有十秒，我问佢你望咩啊？佢冇回答我，但佢眼神话我知佢好疑惑。然后佢抓起小被子捂住自己的脸，钻入我的怀里。
我一路拍一路扫佢背脊，冇事嘅冇事嘅。过咗一阵，佢肚饿了，话我要奶奶。之后就好似咩事都冇发生过一样，饮完奶就瞓了。
我同冰讲起，佢话可能阿爷翻嚟睇孙，如果阿爷见到两个孙咁企理，肯定开心到飞起。
我谂起好细个嘅时候，屋企係，瞓阁仔。有一晚，我上床之后从窗口望出去，见到院子的顶棚上飘住一个红脸黑须的人头，就好似粤剧里面的关公一样。我以为自己眼花，卒咗下眼贴住个窗再望真啲，一清二楚就係一个人头。
我即刻叫老窦：“老窦老窦，出面有个人啊，一直望住我哋！”
老窦即刻爬上嚟问我喺边度。我指住人头个位置：“嗰度啊，就喺竹竿旁边。”
老窦望咗两眼，话冇啊，係米睇错啊。我用力推个100年都唔会开一次的窗，终于推开咗一条10cm左右嘅罅，伸只手仔出去指住个人头话：“呐，就喺嗰度。”
老窦停咗一下，即刻闩翻埋个窗：“冇啊你睇错了，咩都冇，快睇瞓觉。”
我仲想睇多两眼，不过老窦推我落床唔畀睇了。
我细个睇港产鬼片，次次都吓到要用手遮住对眼漏条罅。但我当时完全唔觉得惊，好想望多两眼，感觉好有安全感。
后来到咗高中，我有几次梦到自己喺文德路，唔知几时多咗一座庙，庙里面供奉关公，大大小小好多关公。
再后来，阿妈话佢以前去揾神婆问米，神婆话阿公做咗关公。
我谂，唔通阿公翻嚟睇我？